ஜனநாயக திருவிழா
முனைவர்
பீ. பெரியசாமி
1. வாக்குறுதி (தேர்தல் நேரம்)
தேனொழுகப் பேசித் தெருவெல்லாம்
வாக்குறுதி
வானத்துக் காரியம் வல்லவராய்க்
- கூனிப்
பணிந்துமே நின்றார் பதவியேற்ற
பின்பு
துணிந்துமே போனார் தொலைவு.
2. இலவச அரசியல்
இலவசப் பண்டங்கள் ஈந்துமே மக்களை
நலமிலாப் பாதையில் நாட்டி - வலையமைத்து
வாக்குகளைப் பெற்றுமே வாழ்வார்
அரசியலார்
நாடே நலியும் நலிந்து.
3. கட்சி மாறுதல்
நேற்றுமொரு கொள்கை நிலைகொண்டார்
இன்றுமொரு
மாற்றுக் கட்சிக்கே மாறி - போற்றிப்
புகழ்வார் பழையாரைப் பொல்லார்
எனச்சொல்லி
அகழ்வார் அரசியல் அறம்.
4. மேடைப் பேச்சு
மேடை முழக்கம் மிகையாய் ஒலிக்குமே
கோடை இடியாய்க் குமுறியே - நாடி
நலம்செய்ய மாட்டார் நயவஞ்சக்
காரர்
வலஞ்செய்யும் பொய்யே வலிது.
5. ஊழல் நிலை
மக்களின் வரிப்பணம் மாளிகை ஆகுமே
மிக்கப் பெரும்புள்ளி வீடுகட்கு
- எக்காலும்
ஏழை எளியோர் இளைத்தே கிடக்கையிலே
வாழும் ஊழல் வளம்.
6. சமூக ஊடக அரசியல் (IT Wing)
வலைத்தளத்தில் மோதுவார் வன்பகை
கொண்டே
நிலைத்தநல் உண்மை நலிய - பொய்மைதனை
மெய்யெனவே காட்டி மிதப்பார் அறிவிலார்
ஐயமே நாட்டின் அரசு.
7. உண்மைக் குடிமகன்
நேர்மை வழியில் நிலைகொண்டு நிற்போர்க்கு
யார்வருவார் என்றே ஏக்கமே - ஓர்மையில்லாப்
புல்லர் புகுந்துமே பொய்சொல்லும்
இவ்வேளை
நல்லார் எவரோ நயந்து?
8. வாரிசு அரசியல்
தந்தை வழிவந்தார் தம்பிகள் பின்வந்தார்
விந்தையாய் வாரிசு வேரூன்ற -
அந்தோ
உழைப்பார் ஓரமாய் ஒதுங்கியே நிற்கப்
பிழைப்பார் புகழாரப் பேர்.
9. பணநாயகத் தேர்தல்
பணமே பிரதானப் பங்காற்றும் தேர்தலில்
குணமே குழிதோண்டிப் புதைக்க
- பிணமாய்ச்
சமூகமே வீழ்ந்துமே சாகக் கிடக்குதே
நமதுரிமை ஏனோ நலிந்து?
10. விழிப்புணர்வுத் தேவை
விழிப்பாய் இருப்பதே வீட்டிற்கும்
நாட்டிற்கும்
அழிப்பாய் அமையும் அழுக்காறு
- ஒழித்தே
அறிவால் அரசு அமைப்பதே மேலாம்
நெறியால் உயரும் நிலம்.
கருத்துகள் இல்லை:
கருத்துரையிடுக