மானுடச் சரிவு
ஒரே இரவானாலும்
காலை தீட்டும் திரையினூடே
அபூர்வமென
பகல்கள் பலமாதிரி!
வையம் வரண்டகல
பெருமழை ஏதுமின்றி
துயரங்கள் துருபிடித்துப்போக...
இருந்துமிருக்கிறது
வறட்சி மட்டும் மீதமாய்...
தற்போது ரகசியங்களில்லை
அம்பலப்படுத்த...
குறிப்புகளில்லை சேகரிக்க...
எழுத்துகளில்லை பகிர்ந்துகொள்ள...
சுய பரஸ்பரமில்லை நேசிக்க-நிரூபிக்க...
இருந்தும் எல்லாம் அதனதனூடே
ஒரே மாதிரி!
தொடர் செலவழிதலினூடே
மானுடம் சரிய
இரவு ஒரே மாதிரியும்
பகல்கள் பலமாதிரியும்.